في هذا الدرس يقوم ناصر بالحديث مفصلا عن صوت “التك” في آلة الطبلة وكيفية استخراج هذا الصوت بالطريقة الصحيحة. ينصح ناصر الطالب/الطالبة أن لا يتقدم للدرس التالي إلا بعد إتقان تدريبات هذا الدرس و الأخذ بالنصائح الواردة فيه.

ناصر سلامة:

"مرحبا أنا ناصر من إعزف دوت كوم واليوم رح يكون عنا الدرس التاني لآلة الطبلة.

حكينا بالحصة الماضية عن الأصوات الأساسية اللي ممكن نطلعها بآلة الطبلة اللي هي الدُّم والتك (يعزف الأستاذ ناصر على الطبلة صوت الدُّم وصوت التك). اليوم رح نحكي أكتر عن صوت التك، التك تم استخراجه بالإيد الشمال يعني منطلع الصوت بالإيد الشمال بالأصبع التاني بالمدرسة الشرقية والأصبع التاني والرابع بالمدرسية التركية (يعزف الأستاذ ناصر صوت التك على الطبلة) هاي هي المدرسة التركية (يعزف الأستاذ ناصر صوت التك على الطبلة بطريقة المدرسة التركية) وهاي المدرسة الشرقية (يعزف الأستاذ ناصر صوت التك على الطبلة بطريقة المدرسة الشرقية).

في كمان تك أو في مجموعة من أصوات التك بتطلع بالإيد اليمين أولاً بفتح أصابعي ما بفتحهم هيك بفتحهم بشكل مش مسكّرين زي الدُّم بفتحهم شوي ببعدهم عن بعض بحط إيدي على حفة الطبلة. إذا بنلاحظ دايماً الأصبع الأوسط هو أصبع أطول فبالتالي إذا أنا أصابعي موجودين على حفة الطبلة وبضرب (يعزف الأستاذ ناصر على الطبلة) بالتالي صوت التك رح يطلع بسبب وجود الأصبع الأوسط على حفة الطبلة.

إذاً الصوت بالإيد اليمين (يعزف الأستاذ ناصر على الطبلة باليد اليمنى) بالإيد الشمال (يعزف الأستاذ ناصر على الطبلة باليد اليسرى) نبدا نبدل الأصابع ... الإيدين عفواً يمين شمال يمين شمال يمين شمال يمين شمال (يعزف الأستاذ ناصر على الطبلة مرة باليد اليمنى مرة باليد اليسرى). لازم نركز على موضوعين؛ الأول وضوح الصوت التاني وجود إيقاع في العزف. إيش يعني وجود إيقاع في العزف؟ يعني لما أقول يمين شمال واحد تنين لازم يكون الإيقاع منتظم. ما بصير أقول يمين شمال يمين يمين يمين شمال، لازم يكون يمين شمال واحد تنين يمين شمال يمين شمال يمين شمال (يعزف الأستاذ ناصر على الطبلة مرة باليد اليمنى مرة باليد اليسرى). 

الإشي التاني وضوح الصوت صوت التك لازم يكون على الحفة (يعزف الأستاذ ناصر الصوت على الطبلة) إذا بنزل التك (يعزف الأستاذ ناصر الصوت على الطبلة) هذا الصوت خطأ (يعزف الأستاذ ناصر الصوت على الطبلة) هذا الصوت خطأ وإذا طلعت أكثر عن الحفة (يعزف الأستاذ ناصر الصوت على الطبلة) هذا الصوت خطأ. نفس الإشي في الإيد اليمين (يعزف الأستاذ ناصر الصوت على الطبلة) هذا الصوت خطأ (يعزف الأستاذ ناصر الصوت على الطبلة) هذا الصوت خطأ (يعزف الأستاذ ناصر الصوت على الطبلة) هذا الصوت صح (يعزف الأستاذ ناصر الصوت على الطبلة) هذا الصوت خطأ.

إذا بنحاول نركز على أنه الصوت يكون صح (يعزف الأستاذ ناصر الصوت على الطبلة) ويكون في تناسق بالعـد واحد تنين (يعزف الأستاذ ناصر الصوت على الطبلة) واحد تنين واحد تنين واحد تنين لازم نركز على موضوع، مدة الفترة الزمينية أو الفترة الزمنية هي بحدود من خمسة لعشر دقايـق باليوم لهذا التمرين، ولازم يتم التمرين على مدى أيام أو على مدى فترات طويلة يعني الصوت مش متوقع أو أنه مش من المفروض أنه يكون الصوت واضح ويكون في إتزان بفترة سريعة فلازم التمرين ياخد وقته ولازم يتم بِ على فترات قصيرة من خمسة لعشر دقايق في اليوم عشان ما يتم ما يصير في ملل في التمرين لأنه هاي التمارين الابتدائية هي تمارين بس عشان استخراج الأصوات. 

إذا تكرر التمرين في اليوم مرتين لتلاتة هذا الإشي بساعد أكيد لكن ما يكون من المتوقع أنه يتم استخراج الأصوات على طول في يوم أو في يومين لازم نكرر التمرين كذا يوم عشان يطلع معانا فما تستعجلوا واستنوا الحصة التالتة من دروس الطبلة على إعزف دوت كوم وأنا ناصر سلامة."